CHILL' UOCCHIE

Chill' uocchie mme cercheno,
chill' uocchie mme vonno,
chill' uocchie mme spoglieno.
Songo 'o turmiento
'e 'nu core spierzo
ca campa
c' 'o profumo d' 'o silenzio,
'e 'nu core spezzato
ca s'arravoglia
comm'a 'na rezza stracqua.
Chill' uocchie mm'accarezzeno
comme a 'na manella
quanno s'appòja
'ncopp 'a 'nu vaso carnale.
E io ca chiagno lacreme amare
te parlo,
te chiammo,
te dico :
- Nun me lassà!-
Chill' uocchie songo 'nu tramonto
ca nun s'addorme.
Songo 'na casa
ca nun è casa.
Chill' uocchie songo 'e llampare
'e 'nu core marenaro
ca se cunnulèa
'ncopp' a ll'onne d' 'o tiempo
addò aspetta ò sole
pè se scarfà,
'a luna
pè se cunzulà.
Pè cchill' uocchie
làssate tuccà,
làssate vasà,
làssate astregnere,
làssate strujere
'a chesti ddete
ca se vonn' addurmì
'ncopp' a stu pietto
ca nun è pietto
ca è arena senza scoglio,
ca è scoglio senz' arena.

FONTE: http://www.poesienapoletane.it